KYON?

Humsafar humkadam na ho,

to haath mein ho haath kyon?

Jab taal mein koyi sam na ho

To sukh hai kya ? to saath kyon?

Hariyaala man sukdha hua,

Khadha kyon jaane thoonth sa?

tha pyaar sach jo kal talak

Lage kyon jaane jhooth sa?

Nazar ghuma loon har taraf,

geheraate itne sawaal kyon?

Chala tha khojne kiran,

to andhiyaare ke bawaal kyon?

Nayee subah ki roshni

Deti hai phir dhokha naya,

Bikharta taash ka wo ghar

Koshish naakam kar gaya.

Jis ghar mein dekhoon ashq hain,

Jis ghar mein dekhoon aag kyon?

hamsafar hamkadam na ho,

to haath mein ho haath kyon?

SHABD

Shabdon ko kabhi saadh kar,

shabdon ko jhel kar,

yash bahut kamaaya

shabdon se khel kar.

Shabdon ne bandhi seema

shabdon ne saadhi taan,

shabdon ki taal laya mein

bandh kar khinchi kamaan.

Shabdon ne dard samjha

shabdon ne di zabaan,

Jo ankahi thi ab tak

usko mila unvaan.

Shabdon ne di sahej kar

har aas, har ummeed,

shabdon mein dhaleen ghazalen

au' badon ki taqeed.

Ik shabd rooh ka bhi,

wo shabd jo sun paaun,

shabdon ke mayajaal se

shayad mukt ho jaaun.